Jarrod Bowen, vængmaður West Ham, er orðaður við Liverpool í staðarblaðinu Liverpool Echo.
Hinn 24 ára gamli Bowen kom til West Ham frá Hull City í fyrra. Hann hefur skorað 9 mörk og lagt upp önnur 11 fyrir félagið.
Talið er að Bowen gæti fært Liverpool breidd í fremstu víglínu.
Englendingurinn var orðaður við Liverpool í sumar. Þrátt fyrir að ekkert hafi orðið úr skiptunum þá er ekki hægt að útiloka að svo verði í janúar eða í sumarglugganum eftir tæpt ár.
David Moyes, stjóri West Ham, vill eflaust ólmur halda í Bowen. West Ham leikur í Evrópudeildinni á þessari leiktíð eftir frábært gengi í fyrra.
Liðið er í áttunda sæti ensku úrvalsdeildarinnar sem stendur. Þá er það einnig komið í 16-liða úrslit enska deildabikarsins eftir að hafa slegið Manchester United úr leik í 32-liða úrslitunum í vikunni.
