Nýtt myndband frá kvöldi Wayne Rooney, fyrrum knattspyrnumanni og nú knattspyrnustjóra, með þremur 21 árs gömlum stúlkum á djamminu um helgina er nú í dreifingu. Myndbandið er af því þegar Rooney og stelpurnar gengu að hótelherbergi þeirra síðarnefndu.
Sjá einnig: Rooney hringdi á lögreglu vegna myndanna – Segist ekki hafa gert neitt rangt
Rooney, sem er giftur og á fjögur börn, sem og nokkrir félagar hans eru sagðir hafa boðið stúlkunum á VIP-borð sitt á skemmtistaðnum Chinawhite í Manchester á laugardag.
Eftir á er Rooney sagður hafa farið á hótelherbergi stelpnanna ásamt tveimur félögum sínum. Þó kemur fram að ekkert af kynferðislegum toga hafi átt sér stað. Rooney er hins vegar sagður hafa hrósað stelpunum mikið fyrir útlit sitt.
Rooney er svo sagður hafa dáið áfengisdauða í stól á hótelherberginu. Þá fóru stelpurnar að atast í honum. Ein þeirra tók til að mynda mynd af sér þar sem hún rak rassinn á sér í andlit Rooney.
Hann vaknaði svo í gærmorgun á hótelherberginu. Hann var fljótur að láta sig hverfa. Í kjölfarið deildu stelpurnar myndum af honum frá kvöldinu áður á samfélagsmiðlum. Þær urðu fljótar að dreifast út um allt.
Rooney á svo daginn eftir að hafa kvartað til lögreglu vegna myndanna þar sem þær voru teknar án hans samþykkis. Hann er einnig sagður harður á því að hann hafi ekki gert neitt rangt.
Myndbandið sem nú er í dreifingu má sjá með því að smella hér. Það sýnir að Rooney var virkilega ölvaður þetta kvöld.
