Fundað var í höfuðstöðvum KSÍ í dag þar sem breyting á mótamálum voru til umræðu, hagsmunaaðilar í tveimur efstu deildum karla voru þar mættir á svæðið og ræddu málið. Þetta herma öruggar heimildir 433.is.

Á ársþingi Knattspyrnusambands Íslands um liðna helgi var kosið um breytingar á efstu deild karla, þar voru allar tillögur felldar er komu að mótamálum. Aðilar ræða nú málin saman og reyna að finna samkomulag til að breyta mótamálum fyrir næsta ár, rætt er um útfærslur og hvort hægt að ná sé samkomulagi milli aðila. Samkvæmt heimildum hófst fundurinn klukkan 14:00 í dag og stóð í tæpa tvo klukkutíma.

Fram, Fylkir, ÍA og starfshópur KSÍ höfðu lagt inn tillögur um breytingu á mótafyrirkomulagi efstu deildar karla á ársþingi KSÍ sem fer fram þessa stundina. Fylkir og ÍA drógu tillögur sínar til baka og því var kosið um tvær tillögur, önnur þeirra var frá Fram og hin frá starfshópi KSÍ.

Fram lagði til fjölgun í efstu deild upp í 14 lið en starfshópurinn lagði til að áfram yrðu 12 lið en eftir tvöfalda umferð yrði deildin tvískipt þar sem sex efstu liðin myndu mætast og sex neðstu. Báðar þessar tillögur voru felldar en 2/3 þurftu að kjósa með tillögu svo hún gæti verið samþykkt. 58% voru með tillögu Fram en 54% með tvískiptri deild. Það er ekki nægur stuðningur og báðar tillögur því felldar.

Til að breyta lögum KSÍ þarf það að fara í gegnum ársþing, með því að fara yfir málin og ná samkomulagi í tíma væri hægt að undirbúa mótið fyrir næsta ár með breyttu fyrirkomulagi og kjósa svo um það á næsta ársþingi KSÍ. Málið myndi þá fljúga í gegn enda búið að semja um það áður en þingið færi af stað.

Samkvæmt heimildum 433.is er það von flestra sem koma að borðinu að hægt verði að breyta fyrirkomulaginu á efstu deild karla fyrir sumarið 2022.