Barcelona og Sevilla mættust í seinni viðureign liðanna í spænska bikarnum í kvöld. Fyrri leikur liðanna endaði með 2-0 sigri Sevilla og því þurfti Barcelona að vinna upp forskot gestanna. Leikið var á Nou Camp, heimavelli Barcelona Það var Ousmane Dembélé sem kom Barcelona yfir í leiknum með marki á 12. mínútu.
Fernardo, leikmaður Sevilla var rekinn af velli á 92. mínútu og hlutirnir áttu eftir að versna fyrir gestina.
Barcelona þurfti annað mark til þess að halda sér á lífi í einvíginu. Markið kom nokkrum sekúndum fyrir leikslok. Markið skoraði Gerard Pique með skalla eftir hornspyrnu á 94. mínútu. Samanlögð staða einvígisins því orðin 2-2 og grípa þurfti til framlengingar.
Þar reyndust Börsungar sterkari aðilinn. Martin Braithwaite, leikmaður Barcelona, skoraði þriðja mark leiksins á fimmtu mínútu framlengingarinnar.
Luuk De Jong, leikmaður Sevilla, var síðan rekinn af velli á 103. mínútu og Sevilla því tveimur mönnum færri.
Fleiri mörk voru ekki skoruð í leiknum sem endaði með 3-0 sigri Barcelona. Samanlögð niðurstaða einvígisins er því 3-2 sigur Barcelona sem fer áfram í næstum umferð spænska bikarsins.
Barcelona 3 – 0 Sevilla (Samanlagt 3-2 sigur Barcelona)
1-0 Ousmane Dembélé (’12)
2-0 Gerard Pique (’90+4)
3-0 Martin Braithwaite (’95)
