„Arsenal reynir að losa sig við markvörðinn, Rúnar Alex Rúnarsson aðeins fjórum mánuðum eftir að hafa fengið hann,“ segir í fyrirsögn Metro um stöðu Rúnars Alex Rúnarssonar hjá Arsenal.
Sagt var frá því í The Athletic í gær að Arsenal myndi vilja lána Rúnar Alex í neðri deild Englands eða til liðs í Evrópu. Arsenal leitar að markverði til að keppa við Bernd Leno, David Ornstein segir að Arsenal hafi alltaf hugsað um Rúnar sem þriðja kost sinn í markið.
Meira:
Var ekki í plönum Arsenal að Rúnar Alex myndi spila svona mikið – Má líklega fara í janúar
Rúnar var keyptur til Arsenal síðasta sumar frá Dijon, eftir fína byrjun í Evrópudeildinni gerði Rúnar Alex mistök í deildarbikarnum gegn Manchester City. Þau mistök hanga eins og skuggi yfir honum þegar ensk blöð fjalla um málefni hans.
„Arsenal er til í að losa sig við óheppna markvörðinn, Alex Rúnarsson eftir aðeins fjóra mánuði,“ segir í fyrirsögn The Sun.
Mikel Arteta hefur sagt frá því að Arsenal sé að skoða það að fá inn markvörð en segir enga ákvörðun hafa verið tekna um Rúnar Alex. „Við höfum ekki tekið neina ákvörðun um Rúnar Alex, við verðum að taka ákvörðun um hvað við viljum gera,“ sagði Arteta.
Arsenal mun hins vegar ekki losa sig við Rúnar Alex nema félaginu takist að festa kaup á nýjum markverði.
