Phil Foden leikmaður Manchester City og enska landsliðsins var heldur betur í stuði í gær þegar enska landsliðið vann 4-0 sigur á Íslandi. Foden skoraði tvö mörk í síðari hálfleik og fullkomnaði þar góða endurkomu sína í liðið.

Foden var aftur valinn í landsliðið fyrir þetta verkefni eftir að hafa verið rekinn úr landsliðinu í september. Foden og Mason Greenwood höfðu þá brotið sóttvarnarreglur á Íslandi með því að bjóða tveimur íslenskum stúlkum á Hótel Sögu.

Vegna COVID-19 er leikmönnum í landsliðsverkefni bannað að hitta annað fólk til að koma í veg fyrir að smit breiðist út um leikmannahópinn. Málefni Foden og Greenwood vakti heimsathygli og hann tjáði sig um málið eftir sigurinn á Íslandi í gær.

„Þetta var eitt erfiðasta augnablik lífs míns,“ sagði Foden um það þegar allt komst upp og þeir félagar voru reknir úr landsliðinu.

„Á svona augnabliki þarftu traust þjálfarans og Gareth hefur borið mikla virðingu fyrir mér og treyst mér. Ég er þakklátur og er glaður með að geta borgað honum til baka með tveimur mörkum.“

„Ég ætlaði að sanna ágæti mitt nú þegar ég fékk traustið aftur, ég var stressaður til að byrja með en ég naut þess að koma aftur. Þetta eru mín fyrstu mörk fyrir England og þau eru mér mikilvægt. Ég get ekki hætt að brosa.“

Southgate segir að stressið hafi sést á Foden langar leiðir til að byrja með í þessu verkefni. „Það tók hann nokkra daga að ná sér, það sem hann hefur gengið í gegnum er mjög erfitt fyrir unga leikmenn. Á síðustu dögum fór hann að brosa meira. Ég er glaður, ég veit hvað hann getur gert fyrir England.“