Davíð Þór Viðarsson, fyrirliði FH mun leggja skóna á hilluna eftir þetta tímabil. Þetta staðfesti hann í samtali við 433.is í dag. Davíð hefur átt magnaðan feril á Íslandi, hann hóf að leika með FH árið 2000. Þá aðeins 16 ára gamall.

Miðjumaðurinn knái var sex ár í atvinnumennsku en hefur frá 2013 leiki með FH og verið afar sigursæll ,,Ég hætti eftir þetta tímabil, þetta er síðasta árið,“ sagði Davíð þegar blaðamaður ræddi við hann í dag.

Davíð hefur sjö sinnum orðið Íslandsmeistari með FH en liðið á átta titla í sögunni, Davíð lék í atvinnumennsku þegar FH varð meistari árið 2012. Hann varð einu sinni bikarmeistari og er svekktur að hafa ekki bætt öðrum við um liðna helgi. ,,Ég hefði viljað hætta með titli, þetta var mjög svekkjandi um helgina,“ sagði Davíð en FH tapaði gegn Víkingi í bikarúrslitum, á laugardag.

,,Ég er 35 ára og mín hugsun hefur verið að hætta að meðan maður getur eitthvað. Þessi ákvörðun hefur verið í hausnum á mér síðasta árið, ég tel þetta góðan tímapunkt.“

FH er í góðri stöðu til að klára þriðja sætið í Pepsi Max-deildinni. ,,Við þurfum að klára þriðja sætið, svo getum við mögulega skoðað fyrir síðustu umferðina hvort annað sætið sé möguleiki.

,,Það er fullt af hlutum sem spila inn í þessa ákvörðun mína, þetta eru 20 tímabil í meistaraflokki. Það er kannski bara kominn tími á að setja púður í aðra hluti.“

Davíð lék á sínum farsæla ferli 9 A-landsleiki fyrir Ísland.

Pepsi Max deildin á 433 er í boði