Hannes Þór Halldórsson, besti markvörður í sögu íslenska landsliðsins hefur verið mikið í fréttum síðustu daga. Hannes fékk frí hjá Val síðustu helgi, vegna meiðsla. Sökum þess gat hann farið í brúðkaup aldarinnar, á Lake Como. Þar gengu Gylfi Þór Sigurðsson og Alexandra Helga Ívarsdóttir í það heilaga.
Mikið hefur verið rætt og ritað um málið, sumir héldu því fram að ákvæði um þetta væri í samningi Hannesar við Val. Hannes tjáði sig um málið við fjölmiðla eftir tap Vals gegn KR í gær, þar sem markvörðurinn hafði náð heilsu á ný.
Smelltu hér til að sjá viðtalið við Hannes
Hannes var meðal annars að svara Hjörvari Hafliðasyni í viðtali sínu í gær. Hjörvar sló því fram að Hannes hefði samið við Val um að fara í brúðkaupið, þegar hann skrifaði undir í apríl. Hjörvar svaraði Hannesi svo í Dr. Football þætti sínum í dag.
,,Í raun og veru er ekkert mál, Hannes Þór fer í brúðkaup hjá manni, sem er besti landsliðsmaður Íslands frá upphafi. Virðing á hann, fær boðið og mætir. Hann spilar landsleik á þriðjudegi og þetta brúðkaup er svo síðasta laugardag. Hann meiðist í leiknum og fer í þetta brúðkaup, Óli Jó leyfir honum að fara til Ítalíu. Ég skil Hannes mjög vel, það er eitt prinsipp sem ég er með í lífinu. Happy wife, happy life. Skrifið þetta niður,“ sagði Hjörvar um málið.
Hjörvar telur að Hannes hafi látið Val vita í apríl að hann færi í brúðkaupið, hann hafi ætlað að fara en meiðslin voru þó til staðar.
,,Hann hefur væntanlega fengið boð þegar hann leikur í Aserbaídsjan, hann segist mæta þá. Svo breytast aðstæður hjá honum, hann fer í Val. Hann skrifar undir og segir ´Þessa daga hér er ég því miður staddur við Como vatn á Ítalíu, ég missi af ÍBV leiknum´,“ sagði Hjörvar en Hannes fékk frí síðustu helgi og fór í brúðkaupið.
Hjörvar segir að ekki sé hægt að fara í svona brúðkaup án þess að undirbúa það vel. Hannes tók ákvörðun seint í síðustu viku að fara vegna meiðsla, það hefur hann sagt í viðtölum. Hjörvar kaupir það ekki, hann kveðst ekki vera svona heimskur.
,,Ég mæti Brennsluna 07:00 í gær og segi bara að hann hafi verið búin að semja um þetta, munnlega. Hafliðason er ekki svona heimskur, auðvitað veit ég að flugið var ekkert allt í einu klárt eftir að hafa meiðst gegn Tyrkjum. Suit-Up gallinn var ekkert allt í einu klár eftir að hafa meiðst á móti Tyrkjum, gistingin við Como vatn var ekkert klár á 0,1. Allur þessi pakki að henda sér í svona brúðkaup, börnin í pössun. Ég styð þetta samt, happy wife, happy life.“