Eiður Smári Guðjohnsen, einn besti knattspyrnumaður í sögu Íslands ræddi stöðu Gylfa Þórs Sigurðssonar hjá Everton. Það gerði hann í hlaðvarpsþættinum, FantasyGandalf sem Hugi Halldórsson og Ingimar Helgi stýra.
Eiður sem er sérfræðingur Símans um enska boltann ræddi stöðu Gylfa Þórs Sigurðssonar í landsliðinu, Gylfi hefur verið á bekknum hjá Everton í síðustu leikjum.
,,Erfitt að segja hvað er í gangi;“ sagði Eiður í þættinum og ræddi svo um það hvar Gylfi eigi að spila og þá umræðu.
,,Mér finnst þessi umræða um hann þegar hann er í holunni, þá á hann að vera neðar. Þegar hann er að spila sem átta, þá á hann að vera í holunni. Það er eins og við séum aldrei búin að finna stöðu fyrir Gylfa, í umræðunni.“
Gylfi hefur að mati Eiðs ekki spilað vel og því er kannski eðlilegt að Marco Silva, stjóri Everton setji hann á bekkinn. ,,Þetta er í fyrsta sinn í langan tíma sem er hægt að segja að Gylfi hefur ekki byrjað tímabilið vel. Ekki spilað nógu vel, það er hægt að kenna liðinu um það, það er hægt að segja að hann eigi að bíta á jaxlinn. Menn hafa alveg lent í því að sitja aðeins á bekknum og líta í eigin barm, með gæðin sem Gylfi hefur á hann að gera meira, þarf að fá að njóta sín meira. Þegar gengi liðsins er eins og það er, svo fyrsti leikurinn sem hann er settur á bekkinn, þá vinna þeir. Þó hann skori, þá er þjálfarinn að hugsa um allan hópinn. Af hverju þá að breyta?.“
Eiður telur að það horfi til betri vegar og að Gylfi komist aftur í liðið.
,,Ég trúi því ekki að hann verði á bekknum, mikið lengur. Gefum honum smá kælingu og fá svör frá honum, það kemur á næstunni. Það eru allir Íslendingar að reyna að finna eitthvað, við viljum vernda okkar mann. Við viljum sjá hann á vellinum, ég hef ekki áhyggjur af því að hann verði á bekknum lengi.“
