Mannvirkjastofnun varar við tækjunum – Hvetur eigendur til að hafa varann á
Svifbretti (e. hoverboards) hafa notið mikilla vinsælda undanfarið ár og virðist ekkert lát vera á þeim vinsældum. Nafnið er kannski ekki lýsandi því brettin svífa ekki bókstaflega en renna öllu heldur mjúklega áfram og notandinn stýrir brettinu því með því að halla sér lítillega í tiltekna átt. Brettin hafa verið afar vinsæl gjafavara bæði í Evrópu og Bandaríkjunum og fjölmörg slík tæki eru komin hingað til lands í gegnum erlendar og íslenskar sölusíður.
Markaðurinn fyrir svifbretti er afar sérstakur. Ógrynni vörumerkja er og virðast þau öll hafa sprottið upp í tengslum við þessa eina tilteknu vöru. Hinir hefðbundnu risar í framleiðslu á raftækjum hafa ekki enn hafið innreið sína á þennan markað. Á vefsíðunni toptenthebest.com má sjá lista yfir bestu svifbrettamerkin árið 2016 og þar má sjá heiti eins og Sque, Spaceboard Electric, Powerboard, Leray, Hovertech, Spaceboard, Sharper Image, Koogo, Razor og Techdrift, sem trónir á toppi listans. Sama síða fjallar um þennan frumskóg af vörutegundunum sem eiga það sameiginlegt að vera fjöldaframleiddar í Kína. Stundum eru mörg mismunandi vörumerki í raun sama varan en þrátt fyrir það er verðmunurinn á milli þeirra oft mikill.
Þetta ástand á markaðinum veldur áhyggjum í ljósi þess að fjölmörg dæmi eru um mikla eldhættu sem stafar af brettunum, dæmi eru um að þau ofhitni eða jafnvel fuðri upp og valdi þar með meiriháttar eldsvoðum. Í febrúar síðastliðnum tilkynntu yfirvöld öryggismála neytendavara í Bandaríkjunum (e. U.S. Consumer Product Safety Commission) að engin tegund af svifbrettum gæti talist örugg. Í tilkynningunni kom fram að endursöluaðilar sem myndu selja svifbretti sem ekki höfðu fengið þar til gerða vottun gætu átt málshöfðun yfir höfði sér. Nokkrum dögum síðar höfðu stórir aðilar á borð við Amazon og Target hætt sölu á svifbrettum. Sama hefur átt sér stað í Bretlandi. Sem dæmi um hversu mikið í umræðunni þessi eldhætta er þá eru sérstakar óbrennanlegar töskur til sölu á Amazon sem fólk er hvatt til að geyma brettin í ef þau eru í hleðslu.
Mannvirkjastofnun tók boltann á lofti hérlendis og hefur birt tvær tilkynningar um hætturnar sem stafa af svifbrettunum. Þar kemur fram að ekki aðeins getur kviknað í brettunum við hleðslu heldur einnig þegar þau eru í notkun og lenda á verulegri fyrirstöðu. Þá er rétt að neytendur hafi varann á ef merkingum á brettunum er verulega áfátt. Mannvirkjastofnun varar sérstaklega við brettum af tegundinni Smart Balance Wheel en hvetur einnig eigendur svifbretta til að hætta allri notkun þeirra ef nokkur vafi leikur á að þau uppfylli öryggiskröfur.