Kaffiunnendur hafa ekki farið varhluta af því að verð á kaffihúsum hefur hækkað töluvert á undanförnum misserum. Athugun DV leiðir í ljós að verðið á tveimur vinsælum kaffidrykkjum hjá kaffirisunum tveimur á Íslandi, Kaffitári og Tei og kaffi, hefur hækkað um allt að 26 prósent á aðeins tveimur árum. Hækkanirnar eru í öllum tilfellum langt umfram verðlagsbreytingar á tímabilinu.

Mikil hækkun milli kannana

DV gerði ítarlega verðkönnun á fjölmörgum kaffihúsum í Reykjavík í lok maí árið 2014 þar sem verð á vinsælum drykkjum var skoðað. Meðal annars verð á latte og cappuccino hjá Kaffitári og Tei og kaffi. DV endurtók verðkönnunina í febrúar 2015 þar sem í ljós kom 10–15 prósenta verðhækkun á drykkjunum tveimur hjá þessum tveimur umsvifamestu kaffifyrirtækjum landsins. Nú rúmu ári síðar hafa kaffibollarnir enn hækkað í verði frá síðustu athugun DV.

Ríflega 20% hækkun

Í maí 2014 kostaði bolli af latte 495 krónur hjá Tei og kaffi en kostar í dag 595 krónur. Þetta er hækkun um 20 prósent, eða 100 krónur. Bolli af cappuccino kostaði á sama tíma 475 krónur en 585 krónur í dag og hefur því hækkað um 23 prósent, eða 110 krónur.

Fyrir tveimur árum kostaði bolli af latte 500 krónur hjá Kaffitári en 630 krónur í dag, það gerir hækkun upp á 26 prósent eða 130 krónur. Cappuccino kostaði 470 krónur en er nú á 580 krónur og hefur því hækkað um 23 prósent, eða 110 krónur.

Þetta segja þau um hækkanir

Forsvarsmenn fyrirtækjanna hafa gefið þær skýringar á hækkunum milli áranna 2014 og 2015 að þær megi rekja til hærri rekstrarkostnaðar, launakostnaðar, hráefniskostnaðar sem og breytinga sem urðu á virðisaukaskattþrepunum í ársbyrjun 2015. Allt hafi þetta leitt til þess að fyrirtækin neyddust til að hækka verð til neytenda.
DV leitaði skýringa hjá fyrirtækjunum á hækkunum sem orðið hafa síðan þá.

Halldór Guðmundsson, framkvæmdastjóri kaffihúsa hjá Tei og kaffi, segir að verðhækkanir í vor hafi komið til vegna launahækkana í ársbyrjun, auk þess sem verð á aðföngum frá öðrum fyrirtækjum hafi hækkað vegna kjarasamninganna. Hann bendir einnig á að skömmu eftir könnun DV í maí 2014 hafi hækkun verið í pípunum sem og varð, í júní 2014. Hækkun sem beðið hafði verið með í tvö ár.

„Einnig má taka fram að við drógum hækkun okkar vegna virðisaukaskatthækkana úr 7% í 11% á nokkrum drykkjum til baka í byrjun árs 2015.“

Sólrún Björk Guðmundsdóttir, markaðs- og rekstrarstjóri Kaffitárs, segir að verð á umræddum kaffidrykkjum hafi hækkað um fimm prósent í apríl síðastliðnum, frá því sem var í maí 2015. Þá hafi launakostnaður kaffihúsa aukist verulega frá því í janúar í fyrra auk þess sem hækkun á leigu og aðföngum sé aðalástæðan fyrir hækkun á kaffidrykkjum í apríl síðastliðnum.