Jólatónleikar Mótettukórs Hallgrímskirkju eru að margra mati ómissandi hluti af jólunum. „Á hverju ári fyllum við kirkjuna af óviðjafnanlegri birtu, yl og fallegum jólasöngvum. Það er stór hópur fólks sem kemur á jólatónleikana okkar ár hvert og segist vart geta haldið jólin almennilega án þess að hafa hlýtt á jólatónleika Mótettukórsins,“ segir Hörður Áskelsson, stjórnandi kórsins.

Kórinn í fantagóðu formi

Kórinn byrjaði vetrarstarfið með pomp og prakt og skellti sér til útlanda í kórakeppni. „Því er kórinn sérstaklega öflugur núna og í góðu formi. Kórinn samanstendur af frábæru söngfólki og eigum við fína einsöngvara í röðum okkar sem fá að spreyta sig á tónleikunum í ár. Að sama skapi er Hallgrímskirkja að margra mati ein fallegasta kirkja Íslands og má með sanni segja að hljómurinn sé guðdómlegur. Mótettukórinn býr yfir fallegum og viðkvæmum hljóm sem passar fullkomlega við hljóm kirkjunnar,“ segir Hörður. Því má búast við að tónleikarnir í ár verði einstaklega fallegir. „Við leggjum upp með að vera með notalega og fallega stemningu sem fylgir hlustandanum út í gegnum aðventuna alveg fram að jólum, og lengra jafnvel,“ segir Hörður.

Hlóðlát hrifning

Mótettukórinn einsetur sér að halda fjölda tónleika ár hvert með fjölbreyttu lagavali og jólatónleikarnir eru engin undantekning. „Yfir öllum lögunum liggur einhver óútskýranleg dulúð. Tónlistin er frá ýmsum tímum tónlistarsögunnar, allt frá latínusálmum endurreisnartímans til innlendrar og erlendrar samtímatónlistar. Þess má geta að nýtt verk, Magnificat, eftir Sigurð Sævarsson verður flutt í fyrsta sinn á Íslandi. Söngvarnir eiga það sameiginlegt að þeir svipast inn á við og nálgast jólaundrið af kyrrlátri hrifningu,“ segir Hörður.

Nýr jólasöngur með fiðlu

Með kórnum spila Björn Steinar Sólbergsson organisti og fiðluleikarinn Auður Hafsteinsdóttir, en þess má geta að fluttur verður nýlegur jólasöngur sem var skrifaður fyrir fiðlu og kór, Serenity eftir norska tónskáldið Ola Gjeilo. „Þessi blanda er afar óvenjuleg en kemur alveg dásamlega vel út,“ segir Hörður. Að auki spilar Auður tvö einleiksverk með Birni.

Tvennir tónleikar

Jólatónleikarnir verða tvennir, annars vegar 2. desember, sem er fyrsti í aðventu, og svo 4. desember. „Á undanförnum árum hefur verið fullt hús á þessum tvennum tónleikum og við þurft að hafa aukatónleika. Við hvetjum því alla sem hafa áhuga á að næla sér í miða að gera það sem fyrst,“ segir Hörður.

Nálgast má miða á tónleikana á midi.is og í miðasölu Hallgrímskirkju.