„Þetta er ein stærsta vímuefnalausa hátíðin á landinu um verslunarmannahelgina og er orðin gríðarlega vinsæl,“ segir einn skipuleggjenda hátíðarinnar. „Hátíðin hefur verið haldin frá árinu 1992 og stækkar með hverju árinu. Við bjóðum upp á dagskrá fyrir alla fjölskylduna frá morgni til kvölds, bæði fasta liði og nýja. Og við erum með sérstaka dagskrá fyrir unglingana öll kvöldin.“
Boðið er upp á fjölda viðburða og skemmtiatriða og ættu allir í fjölskyldunni að finna eitthvað við sitt hæfi.
Fjölbreytt dagskrá – eitthvað við allra hæfi
Einn af hápunktum hátíðarinnar eru tónleikar með stórstjörnunum Regínu Ósk og Friðrik Ómar sem verða á laugardagskvöldinu.
Á sunnudag er Hæfileikasýning barnanna, sem öll börn geta tekið þátt í og þarna hafa margir stigið sín fyrstu skref á sviði. Á sunnudag fara Sæludagaleikarnir líka fram, þar er keppt í ýmsum greinum eins og sterkasta Vatnaskógavíkingnum og frjálsum íþróttagreinum og einnig er boðið upp á Wipeout-braut, þar sem leysa þarf alls konar þrautir til að komast í gegnum brautina. Og á sunnudagskvöld er brekkusöngur og varðeldur, sem hefur fest sig í sessi á hátíðinni, og hafa ýmsir einstaklingar í hópi gesta séð um að skemmta.
Fræðslustundir verða á dagskrá og fjallar ein þeirra um stofnanda KFUM og KFUK, Sr. Friðrik Friðriksson, í tilefni af 150 ára afmæli hans. Kvikmynd um Sr. Friðrik verður sýnd.
„Það er hoppukastalaþorp fyrir börnin og bátar til útláns án endurgjalds. Fastir liðir eins og Vatnafjör eru á sínum stað. Tuðrudráttur um Eyrarvatn, koddaslagur, kvöldvökur og margt fleira.“
Ógleymanlegt fjölskylduævintýri
Sæludagar hafa verið órjúfanlegur hluti margra fjölskyldna sem hafa gert sér ferð í Vatnaskóg ár eftir ár. Sífellt bætast fleiri fjölskyldur í hópinn og margir hafa á orði að þarna hafi þeir loks fundið hið fullkomna fjölskyldufrí yfir verslunarmannahelgina. Sæludagar eru vímuefnalaus og fjölskylduvæn hátíð þar sem allir eru velkomnir.
Allar upplýsingar um Sæludaga í Vatnaskógi má finna á eftirfarandi vefsvæðum; Facebook-síðunni https://www.facebook.com/saeludagar/ og vefsíðunni http://vatnaskogur.is/saeludagar/