Kaffivagninn, Grandagarði 10
„Það er geysileg aukning hjá okkur í morgunverðinum. Þar spilar inn í að það eru svo fáir staðir opnir snemma á morgnana en hérna er opnað klukkan hálf átta. Hér er stundum fullt út úr dyrum og gestahópurinn spannar alla flóru mannlífsins, hér eru erlendir ferðamenn, ungt námsfólk og fjölmargir fastagestir í eldri kantinum. Þessi fjölgun hefur orðið án þess að við höfum verið að auglýsa morgunverðinn sérstaklega, orðsporið hefur borist víða og frábærar umsagnir á TripAdvisor hafa haft sín áhrif.“
Þetta segir Mjöll Daníelsdóttir sem rekur hinn fornfræga stað Kaffivagninn úti á Granda. Morgunverðarstemningin á Kaffivagninum þykir einstök og stundum er salurinn fullsetinn strax upp úr klukkan hálf átta á morgnana. Eitt af því sem gerir stemninguna einstaka er hópur fastagesta sem ávallt drekkur saman kaffi á morgnana:
„Þetta eru afskaplega flottir karlar, fágætir fuglar. Til dæmis hann Dagfinnur flugmaður sem er orðinn 91 árs. Svo er það lögreglustjóri úr Keflavík og hér er líka hann Bjössi Króna, Kristján Knútsson og margir aðrir gamlir og frægir spekingar,“ segir Mjöll.
Morgunverðarúrvalið er afar fjölbreytt: „Við erum með venjulegan gamaldags hafragraut og síðan lúxus hafragraut með chia-fræjum, jarðarberjum og bláberjum; við erum með reyktan lax með eggjahræru, egg og beikon, nýbökuð hveitihorn og rúnnstykki og margt fleira.
Kaffivagninn er opnaður klukkan hálf átta á morgnana og lokar klukkan 18. Segja má að dagurinn á Kaffivagninum skiptist í þrjá kafla: Morgunverðinn, hádegisverðinn og síðdegiskaffið. Töluverð endurnýjum hefur orðið á matseðlinum eftir að Mjöll og eiginmaður hennar, Guðmundur Viðarsson, tóku við rekstri staðarins árið 2013, en Guðmundur er matreiðslumeistari staðarins. Hádegisverðurinn hefur verið nútímavæddur:
„Við leggjum mikla áherslu á fiskrétti og erum á þessum skandinavísku nótum. Flestir fiskréttirnir okkar eru bornir fram á pönnum. Einn af þessum pönnuréttum má kalla aðalsmerki Kaffivagnsins en það er þorskhnakki, gratíneraður með rækjum og béarnaise-sósu, Julian-grænmeti og kartöflum. Þetta er afar vinsæll réttur. Síðan erum við með gömlu góðu réttina sem við förum með upp á næsta stig. Þar má nefna plokkfisk, fiskibollur, bleikju og fiskisúpu. Þá erum við með smurbrauð með rauðsprettu en fyrir þá sem alls ekki vilja fisk þá bjóðum við líka upp á smurbrauð með roast beef sem við poppum dálítið upp.“
En jafnframt þessu heldur Kaffivagninn í sínar gömlu hefðir og hefur því yfir sér „retro“ yfirbragð sem mörgu yngra fólki þykir mjög eftirsóknarvert. Þannig er til dæmis vinsælt að fá sér uppáhellt kaffi og kleinu í eftir miðdaginn og „hvar annars staðar en hér færðu rjómapönnukökur,“ segir Mjöll.
Enn fremur eru allar kökur á Kaffivagninum bakaðar á staðnum fyrir utan tvær tegundir sem eru sérbakaðar fyrir Kaffivagninn.
Kaffivagninn er að Grandagarði 10. Opið er virka daga frá kl. 07.30 til 18.00 og um helgar frá 09.00 til 18.00. Heimasíðan er www.kaffivagninn.is og Facebook-síða er www.facebook.com/kaffivagninn.
