Myndband sem sýnir óútskýrðan hlut á sveimi er meðal þeirra gagna sem nýlega voru gerð opinber af bandaríska varnarmálaráðuneytinu, Pentagon.

Eins og DV fjallaði um í morgun varði ráðuneytið 22 milljónum Bandaríkjadala árlega, á árunum 2007 til 2012, í rannsóknir á fljúgandi furðuhlutum.

Verkefnið kallaðist „Advanced Aerospace Threat Identification Program“ og var komið á laggirnar að frumkvæði Harry Reid, þáverandi þingmanns demókrataflokksins.

Á meðfylgjandi myndbandi, sem Washington Post fjallaði um um helgina, kemur fram að orrustuflugmenn hafi orðið orðlausir þegar þeir komu auga á óútskýrðan sporöskjulaga hlut á sveimi skammt frá þeim. Á myndbandinu má sjá hlutinn kyrrstæðan, eða því sem næst, áður en hann flýgur burt á ógnarhraða.

Enginn virðist vita með vissu hvað þetta var sem flugmennirnir sáu en myndbandið var eitt þeirra verkefna sem Pentagon fékkst við á sínum tíma.

Luis Elizondo, fyrrverandi stjórnandi verkefnisins, hafði veg og vanda að því að birta myndbandið opinberlega. Hann segir að myndbandið eitt og sér geti komið flugmönnum að gagni en einnig varpað meira ljósi á þessa starfsemi innan Pentagon á sínum tíma – starfsemi sem fór ekki hátt á þeim árum sem hún stóð yfir. Verkefnið var lagt á hilluna árið 2012 þar sem önnur verkefni þóttu mikilvægari.

Elizondo segir að á þeim árum sem verkefnið stóð yfir hafi yfirvöld aldrei fengið í hendurnar neinar haldbærar sannanir fyrir tilvist geimvera. Elizondo segir þó að þau gögn sem hann hafi safnað eigi skilið að fá meiri athygli.

Harry Reid sagði á Twitter-síðu sinni um helgina, eftir að fjallað var um verkefnið, að sannleikurinn væri þarna úti. Vísaði hann í X-Files þættina sálugu. Gagnrýndi hann að varnarmálaráðuneytið notaði ekki meira fjármagn í rannsóknir af þessu tagi.

„Ef einhver heldur því fram að hann hafi svörin þá er hann að blekkja sjálfan sig. Við vitum ekki svörin en við erum með mikið af gögnum sem styrkja okkur í því að við eigum að spyrja spurninga. Þetta snýst um vísindi og þjóðaröryggi. Ef Bandaríkin eru ekki í forystu um að afla svara við þessum spurningum þá gera aðrir það.“

[youtube https://www.youtube.com/watch?v=tf1uLwUTDA0&w=560&h=315]