Hæstiréttur hefur staðfest dóm Héraðsdóms Vesturlands og sýknað landeigandann Kára H. Jónsson af kröfum Kirkjumálasjóðs Þjóðkirkjunnar. DV hefur fjallað um málið sem snýr að áralangri deilu um dúntökuhlunnindi af æðarvarpi á jörð Kára á Snæfellsnesi.

Kári vann fullnaðarsigur héraðsdómi í október í fyrra en í janúar síðastliðnum greindi DV frá því að Kirkjuráð hefði samþykkt að áfrýja málinu til Hæstaréttar. Á fimmtudag kvað Hæstiréttur upp dóm í málinu þar sem Kári er sýknaður og dómur Héraðsdóms Vesturlands látinn standa ósraskaður.

Þjóðkirkjan hafði verið dæmd til að greiða Kára 1,2 milljónir í málskostnað í héraði en Hæstiréttur dæmir hana til að greiða honum 800 þúsund krónur í málskostnað fyrir Hæstarétti. Alls kostaði það því ríkiskirkjuna tvær milljónir að reyna að sækja aukatekjur í formi dúntökuhlunninda fyrir sóknarprestinn á Staðastað úr höndum hins 76 ára gamla landeiganda. Í samtali við Kára í janúar síðastliðnum sagði hann það sorglegt að kirkjan væri að standa í því að lögsækja sóknarbörn sín og reyna að hafa af þeim eignir þeirra.

Sjá einnig:

Dúntökudeilan fer fyrir Hæstarétt

Kári lagði kirkjuna í dúntökudeilu

[Kirkjan ætti að „skammast sín“](http://www.dv.is/frettir/2014/5/8/kirkjan-aetti-ad-skammast-sin-GLUFLL/

Þjóðkirkjan sver af sér hörku í dúntökumáli

Dreginn fyrir dóm vegna æðardúns