Stórtíðindi í Bretlandi eftir niðurstöðu þjóðaratkvæðagreiðslu um veru Breta í ESB
Bretar hafa kosið að ganga úr Evrópusambandinu. Þetta er niðurstaða þjóðaratkvæðagreiðslu um áframhaldandi veru þeirra í ESB. David Cameron, forsætisráðherra Breta, hefur tilkynnt að hann muni segja af sér í kjölfar niðurstöðunnar.
51,9 prósent kjósenda ákváðu að hagsmunum Breta væri betur borgið utan sambandsins en innan þess. David Cameron tilkynnti um ákvörðun sína nú í morgunsárið þegar niðurstöðurnar lágu fyrir. Cameron var harður talsmaður þess að Bretar yrðu áfram innan ESB.
Cameron ávarpaði blaðamenn í Downing-stræti í morgun og í því sagðist hann vera stoltur af verkum sínum sem forsætisráðherra. Sagði hann að breska þjóðin hefði með niðurstöðunni ákveðið að fylgja annarri leið en hann mælti með og þess vegna þyrfti þjóðin nýjan forsætisráðherra.
Niðurstöðurnar hafa þegar haft víðtæk áhrif á breskt hagkerfi og munu koma til með að hafa enn víðtækari áhrif næstu vikurnar. Þannig hefur breska pundið ekki verið veikara í 31 ár og markaðir um allan heim hafa titrað eftir að niðurstöðurnar lágu fyrir. Breska FTSE-vísitalan tók skarpa dýfu þegar ljóst var hver niðurstaða þjóðaratkvæðagreiðslunnar yrði.
Óhætt er að segja að niðurstöðurnar komi á óvart enda bentu skoðanakannanir til þess, síðustu dagana fyrir atkvæðagreiðsluna, að Bretar myndu kjósa að vera áfram innan sambandsins.
Nú munu Bretar hefja þá vinnu formlega að draga sig úr Evrópusambandinu og í frétt breska blaðsins Guardian kemur fram að sú vinna gæti tekið um tvö ár.