VG vildu kanna hvort grundvöllur væri fyrir viðræðum – Bjarni vildi aðkomu Framsóknar
Katrín Jakobsdóttir, formaður Vinstri grænna, kannaði í gær hug Bjarna Benediktssonar, formanns Sjálfstæðisflokksins, til viðræðna um hugsanlegar stjórnarmyndunarviðræður flokkanna tveggja, ásamt einhverjum þriðja flokki. Fyrir þessu hefur DV öruggar heimildir. Bjarni var hins vegar ekki tilbúinn til þess nema því aðeins að Framsóknarflokkurinn kæmi að borðinu sem þriðji flokkurinn. Það gátu Vinstri græn ekki fallist á og því varð ekkert af viðræðunum.
Eins og greint var frá í DV í morgun varð Katrínu það ljóst eftir viðræður við formenn flokkanna í gær að engar forsendur væru fyrir fimm flokka stjórn frá miðju til vinstri. Upp úr viðræðum um slíka stjórn slitnaði í fyrradag þegar í ljós kom að Viðreisn hafði ekki sannfæringu til að halda þeim áfram. Katrín kannaði í gær til þrautar hvort mögulegt væri að fá Framsóknarflokkinn að borðinu í stað Viðreisnar en lenti á algjörum vegg hvað það varðaði. Bæði var Framsóknarflokkurinn ekki tilbúinn í slíkan leiðangur og einnig höfnðuu Píratar samstarfi við Framsóknarflokkinn.
Katrín átti samtal við Bjarna í gær þar sem hún velti upp möguleika á því að flokkarnir tveir myndu ræða möguleika á samstarfi, ásamt þriðja flokki. Horfði Katrín þar til annað hvort Samfylkingar eða Pírata. Bjarni mun hins vegar hafa hafnað þeim umleitunum Katrínar nema því aðeins að Framsóknarflokkurinn yrði þriðji aðilinn að mögulegri ríkisstjórn. Enginn vilji er hins vegar til þess innan Vinstri grænna að ganga til samstarfs við ríkisstjórnarflokkana tvo og reyndi því ekki viðræður milli Vinstri grænna og Sjálfstæðisflokksins. Tók Katrín því ákvörðun um að skila stjórnarmyndunarumboðinu nú í morgun.