Kínverska konan sem legið hefur þungt haldin á gjörgæslu eftir köfunarslys í Silfru á Þingvöllum er látin. Kona var 26 ára gömul og var ásamt eiginmanni sínum að kafa í gjánni á vegum ferðaþjónustufyrirtækis þegar slysið átti sér stað.

Samkvæmt lögreglu sökk konan 30 metra áður en henni var bjargað. Konan var þá meðvitundarlaus og flutt með þyrlu á sjúkrahús.

Slysið átti sér stað um hádegisbilið síðastliðinn þriðjudag. Konan var flutt á gjörgæsludeild Landspítalans þar sem hún lést í dag.

Áður hafa orðið banaslys við köfun í Silfru en í lok árs 2012 drukknaði þar Íslendingur á fertugsaldri þegar hann lenti í óhappi á um 40 metra dýpi í gjánni.