Hæstiréttur mildaði í dag dóm yfir hinni hollensku Mirjam Foekje van Twuijver niður í 8 ár. Hún var dæmd í 11 ára fangelsi í Héraðsdómi Reykjavíkur fyrir smygl á tæplega tuttugu kílóum af fíkniefnum til landsins á föstudaginn langa en hámarks refsing er 12 ár. Sannað þótti að hún var burðardýr í málinu og var hún dæmd sem slík.
Mirijam var handtekin á Keflavíkurflugvelli ásamt sautján ára dóttur sinni um páskana á síðasta ári en í fórum þeirra fundust níu kíló af amfetamíni, tíu kíló af MDMA og tæp 200 grömm af kókaíni. Voru þær báðar hnepptar í gæsluvarðhald en dóttur hennar sleppt þremur vikum síðar.
Dómur Héraðsdóms þótti óvenju þungur þegar litið var til þess að Mirijam var sakfelld sem burðardýr og hafði sýnt lögreglu fullan samstarfsvilja við rannsókn málsins. Um var að ræða þyngsta dóm sem fallið hefur í fíkniefnamáli hér á landi.. Aðeins einu sinni áður hafði einstaklingur hlotið 11 ára dóm en sá dómur var síðar mildaður um eitt ár.
Atli Freyr Fjölnisson var dæmdur í 5 ára fangelsi í Héraðsdómi Reykjavíkur fyrir að taka á móti efnunum og koma þeim áfram til annarra. Ákvað Hæstiréttur jafnframt að milda refsingu hans niður í 4 ára fangelsi.
