Þegar fólk er fjarri heimilinu, í fríi eða vinnuferð, getur sú staða komið upp að farsíminn verði straumlaus eða því sem næst. Þá eru góð ráð dýr ef hleðslusnúran hefur gleymst. Þá getur verið freistandi að fá lánaða snúru til að hlaða símann. En það er betra að fara varlega í slíkt.

Það ætti að vera í lagi að fá slíka snúru hjá fólki sem maður treystir vel en öðru máli gegnir um snúrur frá ókunnugum. Reynslan hefur sýnt að það að fá slíka snúru lánaða getur verið upphafið að gagnamartröð. Þegar síminn er tengdur við hleðslusnúru getur tölvuþrjótur hugsanlega nýtt sér það til að komast yfir innihald símans eða til að koma tölvuveirum fyrir í honum.

Skýringin á þessu er að það er sama snúran sem er notuð til að hlaða síma og til að flytja gögn til og frá honum og þetta vita tölvuþrjótar auðvitað.