Stórmeistarinn Jóhann Hjartarson vann það stórkostlega afrek rétt í þessu að tryggja sér Norðurlandameistaratitilinn í skák. Fyrir utan hinn eftirsótta titil tryggir Jóhann sér þar með eina sætið sem var í boði á Heimsbikarmótið í skák sem fram fer síðar á árinu. Árangur Jóhanns er glæsilegur þegar haft er í huga að helstu keppinautar hans eru atvinnumenn í skák en Jóhann lagði skákborðið á hilluna fyrir rúmum tveimur áratugum.

Þetta er í annað sinn sem Jóhann hreppir Norðurlandameistaratitilinn en síðasti sigur hans var fyrir 20 árum, árið 1997 þegar mótið fór fram hér á landi.

Þá varð Lenka Ptacnikova Norðurlandameistari kvenna í þriðja sinn. Sigur Lenku var afar öruggur og kærkominn.

Norðurlandamótið fór fram í Vaxjö í Svíþjóð og tryggði Jóhann sér sigurinn með öruggu jafntefli gegn sænska alþjóðlega meistaranum Jonathan Westerberg. Skákin var ekki beint spennandi en hinsvegar sáu tæknimálin um það. Á ögurstundu klikkaði beina útsendingin á vefsíðu mótsins og supu íslenskir skákáhugamenn kveljur yfir því að geta ekki fylgst með gangi mála. Loks staðfesti íslenskur skákstjóri mótsins, G. Sverrir Þór, að Jóhann hafði tryggt sér jafntefli.

Það þýddi að Jóhann hafði önglað saman 7,5 vinningum í 9 skákum. Helsti keppinautur Jóhanns, sænski stórmeistarinn Nils Grandelius, vann sína skák gegn danska alþjóðlegameistaranum Jesper Sondergaard Thybo, sem þýddi að hann hlaut einnig 7,5 vinninga. Til þess að skera úr um sigurvegara voru reiknuð stig milli stórmeistaranna. Aðferðin er þannig að lagðir voru saman vinningafjöldi andstæðinga Jóhanns og Grandelius.

Samkvæmt útreikningum blaðamanns hefur Íslendingurinn þar betur og verður því stórmeistarinn Jóhann Hjartarson útnefndur Norðurlandameistari á verðlaunaafhendinu síðar í dag.

Íslandsmeistarinn Guðmundur Kjartanssson tók einnig þátt í mótinu fyrir Íslands hönd en náði sér ekki á strik.