Karen Read hefur kært lögregluembættið sem fór með rannsókn á morði kærasta hennar. Hún segist hafa verið gerð að blóraböggli til að hylma yfir raunverulega morðingjann sem komi úr röðum lögreglunnar.
Mál Karenar vakti gríðarlega athygli þegar hún var ákærð og síðar sýknuð fyrir morðið. Kærasti hennar John O’Keefe fannst látinn veturinn 2022 fyrir utan heimili samstarfsfélaga síns, en þeir störfuðu sem lögreglumenn. Karen var sökuð um að hafa ekið yfir O’Keefe og skilið hann eftir ósjálfbjarga í snjóstormi.
Karen hefur alla tíð neitað sök og bent á margt athugavert við rannsókn málsins. Til dæmis þá staðreynd að O’Keefe fannst látinn fyrir utan heimili lögreglumannsins Brian Albert. Engu að síður hafi vinur Albert og samstarfsfélagi verið settur yfir rannsóknina, sem bendi eitt og sér til þess að rannsóknin hafi ekki verið hlutlaus. Yfirrannsakandinn, Proctor, hafi svo augljóslega lagt fæð á Karen en hann sendi fullt af skilaboðum á kollega sína á meðan hann rannsakaði málið þar sem hann kallaði Karen öllum illum nöfnum og sagðist vona þess heitt og innilega að hún svipti sig lífi. Lík O’Keefe hafi ekki borið þess merki að ekið hafi verið yfir hann heldur þvert á móti bentu áverkar til þess að hann hafi lent í slag, misst meðvitund og svo verið viljandi skilinn eftir úti í kuldanum. Eins hafi mágkona Brian Albert, sem var stödd á staðnum þetta örlagaríka kvöld, notað Google til að komast að því hversu langan tíma það tekur fyrir manneskju að verða úti.
Karen gerir síðan athugasemd við að engin leit hafi farið fram á heimili Brian Albert þrátt fyrir að margt bendi til þess að O’Keefe hafi hlotið höfuðáverka sinn þar.
Nú vill Karen freista þess að fá úr málinu skorið í eitt skiptið fyrir öll og segir ljóst að lögreglan hafi eitthvað óhreint í pokahorninu. Tilraun lögreglu til að koma sök yfir á hana hafi ekki tekist en Karen sitji þó eftir með mikið fjártjón. Hún skuldi nú mikla peninga í lögfræðikostnað, hafi misst vinnuna og orðið fyrir heilsubresti vegna streitu og álags.
