Epstein-skjölin settu allt á hliðina í vikunni sem leið eftir að eftirlitsnefnd fulltrúadeildar Bandaríkjaþings birtu rúmlega 20 þúsund skjöl, flest þeirra tölvupósta, úr dánarbúi Jeffrey Epsteins.

Því hefur lengi verið haldið fram að fyrrum forseti Bandaríkjanna, Bill Clinton, hafi verið fastagestur á einkaeyju Epsteins þar sem brotið var gegn ungum stúlkum.

„Bandaríkjamenn vilja vita hvað átti sér stað á eyju Epsteins. Við vitum að Bill Clinton var þar fastagestur,“ sagði formaður nefndarinnar, James Comer, í viðtali við fjölmiðla í ágúst. „Við viljum fá svör frá honum um hvað hann sá þegar hann var þar og hverjir komu við sögu.“

Donald Trump Bandaríkjaforseti hefur ítrekað haldið því fram að Clinton hafi verið tíður gestur á eyjunni. Forsetinn segir að í Epstein-skjölunum sé að finna skrá yfir flugferðir til eyjunnar og að Clinton hafi verið meðal farþega í um 28 skipti.

Tölvupóstarnir sem nú hafa verið birtir benda þó til annars. Þar skrifar Epstein sjálfur: „Clinton var ALDREI NOKKURN TÍMANN þarna, aldrei.“

Clinton hefur gengist við því að hafa flogið með flugvél Epsteins. Það hafi hann gert í nokkur skipti skömmu eftir aldamótin. Hann hefur þó alltaf neitað því að hafa heimsótt eyjuna aldræmdu.

Einn þekktasti þolandi Epsteins, Virginia Giuffre, hélt því fram að hún hefði séð fyrrum forsetann á eyjunni en tók fram að hún hafi aldrei séð hann gert nokkuð saknæmt.

Þetta er þó ekki í samræmi við gögnin sem nú hafa verið birt. Árið 2015 sendi Epstein tölvupóst á rithöfundinn Michael Wolff og þverneitar því að Clinton hafi heimsótt eyjuna. Vísar Epstein til þess að tiltekin manneskja sé að ljúga því upp á fyrrum forsetann. Nafn manneskjunnar er afmáð í birtu gögnunum en af samhengingu og tímasetningunni má ráða að þar sé Epstein að vísa til Giuffre.