Fjölmiðlamaðurinn umdeildi Tucker Carlson vill vita hverju alríkislögreglan (FBI) er að leyna varðandi banatilræðið gegn Trump síðasta sumar.
Ungur maður að nafni Thomas Matthew Crooks reyndi að ráða forsetann, sem þá var á fullu í kosningabaráttu, af dögum þann 14. júlí 2024 á kosningafundi í Pennsylvaniu. Trump særðist á eyra í árásinni og mátti litlu muna að dagar hans væru taldir. Einn gestur á samkomunni var ekki jafn heppinn og lét lífið við að skýla fjölskyldu sinni.
Crooks var skotinn til bana á vettvangi, en síðan þá hefur Trump og ríkisstjórnin lítið tjáð sig um hvað vakti fyrir þessum unga manni.
Tucker Carlson segir þetta vægast sagt furðulegt.
„Thomas Crooks var hársbreidd frá því að rústa þessari þjóð en samt sem áður vitum við, einu og hálfu ári síðar, nánast ekkert um hann eða hvers vegna hann gerði þetta. Það er vegna þess að FBI, jafnvel núverandi FBI, vill fyrir einhverja ástæðu ekki að við vitum nokkuð,“ sagði Carlson í hlaðvarpi sínu.
Hann sakar dómsmálaráðuneytið og FBI um að fela fyrir almenningi upplýsingar um skotmanninn. Til dæmis hafi samfélagsmiðlar hans verið þurrkaðir út af netinu með methraða.
Fjölmiðlamaðurinn bætti svo við að hann hafi fengið sannreynt afrit af samfélagsmiðlum og stafrænu fótspori Crooks. Frá þessum upplýsingum sé ekki hægt að álykta að banatilræðið hafi verið ófyrirséð og að Crooks hafi verið alfarið einn að verki.
Carlson segir að Crooks hafi birt fjölda færslna á netinu þar sem hann kallaði eftir ofbeldi og morðum þekktra Demókrata. Hann hafi eins verið mikill hægrimaður. Hann var stuðningsmaður Trump og vildi sjá forsetann sem einvald. Eins vildi hann að Trump myndi lækka rostann í latneskum innflytjendum.
Crooks hafi þó snúist gegn Trump árið 2020 í faraldri COVID.
„Þetta var ótrúlegur viðsnúningur,“ sagði Carlson og rakti hvernig Crooks hafi byrjað að kalla eftir ofbeldi gegn þekktum áhrifavöldum á hægri væng stjórnmálanna, þar með talið gegn Carlson sjálfum.
„Svo þarna erum við með óstöðugan, erfiðan og hugsanlega andlega veikan unga mann sem lengi hafði opinberlega hvatt til ofbeldis. FBI vissi klárlega af honum.“
Fjölmiðlamaðurinn sakar FBI um að hafa handvalið færslur frá Crooks til að ljúga um skoðanir hans og hugarfar. Með þessu séu stjórnvöld að koma í veg fyrir að hægt sé að rýna atvikið.
„Hvers vegna gaf FBI það til kynna að Crooks væri með nánast ekkert stafrænt fótspor, fyrir það fyrsta, þegar þeir voru með gífurlegt magn af gögnum, hundruð athugasemda?“
Carlson segir að ef FBI hafi ekkert að fela í þessu máli þá ætti að vera leikur einn að staðfesta það fyrir þingi.
