Lögreglan skýrði frá þessu í tilkynningu að sögn AFP. Formaður stéttarfélags lögreglumanna lýsir drápunum á lögreglumönnunum sem „aftöku“.
„Að vita að þeir séu ekki lengur meðal okkar eftir miskunnarlausa og skipulagða aftöku sýnir vel þá hættu sem við stöndum frammi fyrir dag hvern,“ sagði Ian Leavers, formaður stéttarfélags lögreglumanna, í samtali við ABC fréttastofuna.
Skömmu eftir hádegi í gær fóru lögreglumenn, sem voru að rannsaka mannshvarf, að húsi í bænum Wieambilla. Þar virðist hafa verið setið fyrir þeim og til skotbardaga kom. Tveir lögreglumenn féllu, einn særðist og einn náði að komast á brott við illan leik.
Wieambilla er um 300 km frá Brisbane og þar búa tæplega 100 manns.
Auk lögreglumannanna lést einn almennur borgari og þrír grunaðir. Lögreglan skaut hina grunuðu til bana í gærkvöldi.
Lögreglumennirnir sem létust hétu Rachel McCrow, 26 ára, og Matthew Arnold, 29 ára. Þau áttu ekki langan starfsferil að baki.
Lögreglan segir að sérsveit hafi komið á vettvang í kjölfar skotbardagans og hafi fellt hina grunuðu í gærkvöldi.
