Loksins náðist það markmið sem Joe Biden, Bandaríkjaforseti, hafði sett um fjölda bólusettra í landinu en þó mánuði síðar en stefnt var að. Markmiðið var að 70% fullorðinna hefðu fengið að minnsta kosti einn skammt af bóluefni þann 4. júlí. En um leið og þessi áfangi næst berast fréttir af hríðversnandi stöðu mála, hvað varðar fjölda smita, í Suðurríkjunum. Verst er staðan í Flórída þar sem fjöldi innlagna á sjúkrahús er sá mesti síðan síðasta sumar.

Um helgina voru nýskráð smit í ríkinu 21.000 á dag en það eru 12,1% fleiri en gamla metið. Síðustu mánuði hefur fjöldi nýsmita verið á bilinu 2.000 til 8.000 á dag.

Um 10.000 manns lágu á sjúkrahúsum um helgina vegna COVID-19 veikinda og er fjöldi innlagna kominn á stig sem ekki hefur sést síðan faraldurinn var í hámarki á síðasta ári að sögn Miami Herald. Talið er að það sé hið smitandi Deltaafbrigði sem herjar á ríkið.

Ungt fólk og lágtekjufólk auk íbúa í íhaldssömum ríkjum, Suðurríkjunum og Miðvesturríkjunum hefur ekki verið eins duglegt við að láta bólusetja sig og aðrir og það seinkaði því að markmið Biden næðist. Á síðustu vikum hefur þeim farið fjölgandi sem láta bólusetja sig og nemur aukningin um 70%.