Kínverjar og Rússar hafa ákveðið að taka saman höndum um að byggja geimstöð á tunglinu eða á braut um það.

Rússneska geimferðastofnunin Roscosmos skýrði frá þessu. Fram kemur að Roscosmos og kínverska geimferðastofnunin hafi náð saman um að vinna saman að því að byggja geimstöð, annað hvort á tunglinu eða á braut um það. Hugsanlega munu önnur lönd og alþjóðleg fyrirtæki koma að verkefninu.

Rússland og Kína ætla einnig að efla alþjóðlegt samstarf með verkefninu með því að bjóða öllum löndum, sem vilja taka þátt í því, jafnan aðgang að geimstöðinni. Geimferðastofnanir ríkjanna munu nú hefjast handa við að gera nákvæma áætlun um byggingu geimstöðvarinnar.

Roscosmos segir að stefnt sé að því að senda fólk til tunglsins 2028 og að frá þeim tíma verði fólk alltaf til staðar á tunglinu.