Bandaríska geimferðastofnunin NASA stefnir að því að senda fólk til Mars fyrir árið 2035. En það er ekki einfalt mál að komast til mars og mun krefjast mikillar tækni, bæði ferðalagið sjálft og dvölin á Mars.

Það er kaldara á Mars en Suðurskautinu og lítið sem ekkert súrefni og umhverfið allt mjög erfitt fyrir fólk að lifa í. Ferðalagið þangað er heldur ekki hættulaust og þeim mun lengur sem það varir og þeim mun lengur sem geimfararnir dvelja á Mars, þeim mun meiri hættu eru þeir í.

Vísindamenn hafa því verið að skoða mögulegar leiðir til að stytta ferðatímann. Fyrirtækið Ultra Safe Nuclear Technologies (USNC–Tech) hefur lagt til að nota kjarnorkuknúið geimfar en það myndi stytta ferðatímann niður í þrjá mánuði en talið er að mönnuð geimferð til Mars taki að minnsta kosti níu mánuði. CNN skýrir frá þessu.

Eldflaugin myndi nota úran til að mynda hita sem hitar síðan eldsneyti sem breytist í gas sem skýst út um afturenda geimfarsins/eldflaugarinnar og knýr áfram. Með þessari tækni væri hægt að koma fólki til Mars og heim aftur á undir tveimur árum í stað þriggja. En ein stærsta áskorunin við að smíða vél sem þessa er að finna eldsneyti sem þolir gríðarlegan hitann inni í kjarnorkuhreyfli. USNC–Tech telur sig hafa leyst þetta vandamál með því að búa til eldsneyti sem þolir allt að 2.425 gráðu hita.