Ástæðan er hið skæða Ómíkron afbrigði kórónuveirunnar sem fer mikinn í landinu þessa dagana en smitum af þess völdum fjölgar mikið dag hvern. Sérfræðingar segja að fjöldi Ómíkron tilfella geti tvöfaldast á hverjum tveimur dögum og ef svo fer þá verða tölurnar ekki lengi að verða ótrúlega háar. Þessi smit valda því að margir þurfa að vera í sóttkví og einangrun og svo gæti farið að á aðfangadag verði 100.000 Danir í sóttkví og einangrun.
„Það er mikið áhyggjuefni ef þetta heldur svona áfram. Ef þeim fjölgar á þessum hraða ráðum við ekki við það. Það geta allir reiknað út,“ hefur B.T. eftir Mads Albertsen, prófessor við Álaborgarháskóla.
Á mánudaginn greindust 966 smit af völdum Ómíkron, í gær voru þau 1.088 en þá var nýtt met sett varðandi fjölda smita á einum degi en 8.314 greindust þá með veiruna skæðu.
Danska smitsjúkdómastofnunin vinnur nú út frá þeirri sviðsmynd að smit af völdum Ómíkron muni tvöfaldast á tveggja daga fresti. Ef þetta er reiknað fram í tímann þá þýðir þetta að rúmlega 100.000 manns verða í einangrun eða sóttkví á aðfangadag.
Samkvæmt leiðbeiningum smitsjúkdómastofnunarinnar þá á fólk að fara í sóttkví og pcr-sýnatöku á fyrsta, fjórða og sjötta degi eftir að hafa verið nærri einhverjum sem greinist með smit. Sóttkví lýkur þegar neikvæð niðurstaða berst úr síðustu sýnatökunni. Smitaðir eru síðan í einangrun. Þessa leiðbeiningar gilda um alla, óháð því hvort þeir eru bólusettir eða hafa sjálfir smitast áður.
Til að bregðast við Ómíkron hafa heilbrigðisyfirvöld ákveðið að flýta því að gefa örvunarskammt af bóluefni gegn veirunni og á mánudaginn var opnað fyrir að allir 40 ára og eldri geti fengið örvunarskammt. Nú er bólusett í sérstökum bólusetningarmiðstöðvum, hjá heimilislæknum og í apótekum. Markmiðið er einfaldlega að bólusetja eins marga og hægt er fyrir áramót.
Smitsjúkdómastofnunin gerir ráð fyrir að dagleg smit verði orðin rúmlega 10.000 innan skamms, jafnvel í þessari viku.
