Um síðustu helgi fundust líkamsleifar tveggja systra, sem hurfu fyrir sex árum, á afskekktu svæði í Pennsylvania. Stúlkurnar, sem hétu Jasman og Nicole Snyder, væru 8 og 11 ára ef þær væru á lífi. Þeirra hafði verið saknað síðan 2015. Móðir þeirra, Mary Sue Snyder, hafði alltaf sagt að þær væru hjá vini hennar sem sæi um heimakennslu fyrir þær. Hún var handtekin á vinnustað sínum í Clinton sýslu á föstudaginn.

Independent segir að Snyder hafi verið úrskurðuð í gæsluvarðhald, grunuð um að hafa stofnað lífi barna í hættu og hindrað framgang réttvísinnar varðandi rannsókn á ofbeldi gagnvart börnum.

Lögreglan segir að lík systranna hafi fundist nærri hjólhýsi þar sem Snyder býr ásamt unnustu sinni, hinni 26 ára Echo Butler, og sjö ára syni hennar, Jesse. Hjólhýsið er í eigu foreldra Butler. Butler var einnig úrskurðuð í gæsluvarðhald og Jesse var komið í umsjá félagsmálayfirvalda.

Félagsmálayfirvöld hófu rannsókn á velferð Jess í byrjun september þegar upplýsingar bárust um að hann kynni ekki að nota salerni og hefði ekki verið skráður í skóla. Í framhaldi af því var farið að spyrja spurninga varðandi Jasman og Nicole. Móðir Butler, Michelle Butler, sagðist ekki hafa séð þær í sex ár. Snyder sagði að systurnar væru hjá vini hennar sem annaðist heimakennslu þeirra. En hvorki Snyder né Butler gátu gefið upp nafn þessa vinar.

Lík systranna eru nú til rannsóknar hjá réttarmeinafræðingum og lögreglan hefur staðfest að málið sé rannsakað sem morð.