Breska leyniþjónustan segir að Rússar hafi stolið uppskriftinni að bóluefni AstraZeneca gegn kórónuveirunni og sé rússneska bóluefnið Sputnik V byggt á sömu uppskrift. Áður var vitað að bóluefnin voru búin til með sömu aðferðum en nú virðist sem að um nákvæmlega sömu aðferðir sé að ræða, að minnsta kosti ef leyniþjónustan hefur rétt fyrir sér.

Daily Mail skýrir frá þessu. Þegar heimsfaraldur kórónuveirunnar skall á var Rússland meðal fyrstu ríkjanna til að koma með bóluefni gegn veirunni. En miðað við ásakanir leyniþjónustunnar þá stálu þeir uppskriftinni að bóluefni AstraZeneca en það var þróað í Oxfordháskóla.

Þessar upplýsingar komu fram þegar leyniþjónustumenn skýrðu breskum ráðherrum frá málinu. Þjófnaðurinn, ef rétt reynist, á að hafa átt sér stað með „aðstoð leynilegs útsendara“ sem átti að tryggja að Rússar gætu verið með í kapphlaupinu um að þróa og framleiða fyrsta virka bóluefnið gegn kórónuveirunni.

Það þykir styðja ásakanir leyniþjónustunnar að rússneska Sputnik V bóluefnið er byggt á sömu aðferðum og grunni og bóluefni AstraZeneca en önnur bóluefni gegn veirunni eru byggð á öðrum aðferðum.

Leyniþjónustan er sögð hafa sannanir fyrir að rússneskur útsendari í Bretlandi hafi stolið uppskriftinni að bóluefninu. Ekki hefur komið fram hvort viðkomandi smyglaði skjölum eða bóluefninu sjálfu úr landi.

Breska leyniþjónustan hefur áður skýrt frá því að rússneskir tölvuþrjótar hafi reynt að brjótast inn í tölvukerfi Oxfordháskóla í mars 2020 en það var skömmu eftir að breskir vísindamenn tilkynntu að þeir væru byrjaðir að vinna að þróun bóluefnis gegn kórónuveirunni.