Kínverjar keppast nú við að reisa sóttkvíarmiðstöð sem á að geta hýst allt að 4.000 manns. Hún verður í Shijiazhuang í norðurhluta landsins en þar hefur kórónuveiran látið á sér kræla á nýjan leik að undanförnu. Kínverskum stjórnvöldum hefur tekist ágætlega við að halda faraldrinum niður fram að þessu en síðustu daga hafa borist fregnir af því að hún sé að skjóta upp kollinum hér og þar.

Washington Post segir að stjórnvöld hafi miklar áhyggjur af nýársfögnuði Kínverja um miðjan febrúar en venjulega leggja milljónir landsmanna land undir fót í tengslum við hátíðina til að fagna með fjölskyldu og vinum.

Um eitt ár er síðan fregnir fóru að berast af dularfullum öndunarfæralíkum sjúkdómi sem væri kominn á kreik í Kína. Í kjölfarið barst veiran út um allan heim og er heimsbyggðin enn að glíma við hana.

Kínverjar hafa áður haft hraðar hendur við að reisa nauðsynleg mannvirki og það ætla þeir einnig að gera núna. Framkvæmdirnar hófust 13. janúar og á að ljúka á næstu dögum.