Á miðvikudag í síðstu viku var hringt í um 200.000 norsk símanúmer frá Norður-Kóreu. Um svindltilraunir er að ræða að sögn símafélagsins Telenor sem segir þetta jafnframt vera vaxandi vandamál.

Svindlið gengur út á að þegar svarað er, er skellt á um leið. Þetta er gert í þeirri von að fólk hringi síðan í númerið en þá byrjar gjaldmælirinn að telja og það af krafi. Það getur því reynst dýrkeypt að hringja til baka.

TV2 hefur eftir Thorbjørn Busch, öryggisráðgjafa hjá Telenor, að það sem gerðist á miðvikudaginn hafi verið sérstakt. Þar sem um svo mörg símtöl til Norðmanna hafi verið að ræða bendi það til að um markvissa árás hafi verið að ræða.

Tölur Telenor sýna að hringt var í tæplega 200.000 viðskiptavini félagsins. Rúmlega 8.000 þeirra hringdu aftur í númerið sem hringt var úr. Telenor segir að venjulega séu það sjö til átta prósent símnotenda sem hringa í númerið sem hringt var úr en að þessu sinni hafi hlutfallið verið lægra og það bendi til að Norðmenn séu orðnir meðvitaðri en áður um svindltilraunir sem þessar.