„Þetta er mikið vandamál fyrir hann,“ hefur CNN eftir Michael D‘Antonio sem hefur skrifað mikið um Trump. Hann sagði að Trump hafi skapað eitrað andrúmsloft fyrir mikilvægan hluta þess markaðar sem fyrirtæki hans starfa á. Ekki sé víst að fyrirtæki vilji aftur taka upp samstarf við fyrirtæki hans því flest reyni þau að forðast að lenda í umdeildum aðstæðum.
Í kjölfar atburðanna í síðustu viku hafa mörg fyrirtæki slitið öll tengsl við Trump og fyrirtæki hans á þeim grunni að hann hafi brotið gegn reglum þeirra með því að hvetja til ofbeldis. Önnur hafa gert það sama þar sem þau hafa áhyggjur af að vera tengd við Trump og telja að það geti skaðað ímynd þeirra.
Twitter og Facebook hafa útilokað hann og þar með missti hann samskiptamiðill sinn við umheiminn að stórum hluta. Stripe er hætt að sjá um greiðslukortafærslur fyrir kosningasjóð hans. Shopify er hætt að starfrækja netverslanir fyrir fyrirtæki hans og framboð og PGA hætti við að halda stórt golfmót á einum golfvalla hans.
CNN segir að ekki liggi fyrir hvaða bankar, ef einhver, vilji lána fyrirtækjasamsteypunni peninga. Deutsche Bank hefur lánað henni rúmlega 300 milljónir dollara síðustu 10 árin. En nú eru saksóknarar í New York að fara ofan í kjölinn á viðskiptaháttum Trump og fyrirtækja hans og nær rannsóknin einnig til Deutsche Bank. Bankinn hefur tilkynnt að hann ætli að hætta viðskiptum við Trump.
Á mánudaginn tilkynnti Signature Bank að hann loki einkareikningum Trump og hvatti hann til að segja af sér forsetaembætti. Bankinn sagðist einnig ekki ætla að stunda viðskipti við þingmenn sem hafi greitt atkvæði gegn því að samþykkja niðurstöðu kjörmannaráðsins um að Joe Biden hefði sigrað í forsetakosningunum.
