Í dag er spáð 41,6 stiga hita í Seattle í Washingtonríki í Bandaríkjunum. Ef það gengur eftir verður um hitamet að ræða í borginni en þar búa 725.000 manns. Bandaríska veðurstofan sendi á laugardaginn frá sér aðvörun um óvenjulega mikinn hita í Pacific Northwest en það er svæði sem nær yfir norðvesturhluta Bandaríkjanna og suðvesturhluta Kanada.

Það eru Oregon og Washington í Bandaríkjunum sem eru á þessu svæði og British Columbia í Kanada.

„Flest bendir til að þetta verði ein öfgafyllsta og lengsta hitabylgja síðari tíma,“ segir í tilkynningu frá National Weather Service.

Reiknað er með að mörg hitamet muni falla á þessu svæði á næstu dögum. Yfirvöld í Multnomah County í Oregon, þar sem borgin Portland er, hafa varað við hugsanlegum töfum almenningssamgöngutækja vegna hita en reiknað er með rúmlega 40 stiga hita á svæðinu. Einnig gæti komið til rafmagnsleysis og heilbrigðiskerfið gæti átt erfitt með að standa undir því mikla álagi sem gæti orðið á það.

Íbúar í Portland, sem búa ekki svo vel að vera með loftkælingu heima hjá sér, eru hvattir til að leita í sérstakar miðstöðvar með loftkælingu.

Orkufyrirtæki hafa beðið fólk um að fara sparlega með rafmagn og hafa kallað aukamannskap út til að geta brugðist hratt við rafmagnsleysi.