Maður, sem var grunaður um veiðiþjófnað, var nýlega traðkaður til bana af fílum í þjóðgarði í Suður-Afríku. Maðurinn og tveir samverkamenn hans eru grunaðir um að hafa ætlað að skjóta nashyrninga í þjóðgarðinum.

Í fréttatilkynningu frá Kruger þjóðgarðinum segir að maðurinn og tveir samverkamenn hans hafi flúið undan þjóðgarðsvörðum sem voru við eftirlit. Mennirnir köstuðu frá sér öxi og riffli. Þjóðgarðsverðirnir náðu einum mannanna, einn komst undan en sá þriðji hljóp beint inn í hóp fíla sem tröðkuðu hann til bana. Þjóðgarðsverðir fundu manninn að lokum en gátu ekki bjargað lífi hans.