Í gær féllu allar þær sóttvarnaaðgerðir, sem yfirvöld í Texas höfðu gripið til vegna heimsfaraldursins, úr gildi. Því þarf ekki lengur að nota andlitsgrímur og engar takmarkanir eru á þeim fjölda sem má koma saman. Sérfræðingar súpa hveljur yfir þessu og segja að þetta muni verða til þess að útbreiðsla margra afbrigða kórónuveirunnar muni aukast mikið.

Texas er fimmta ríkið sem fellir kröfuna um notkun andlitsgríma úr gildi. Ekkert land í heiminum hefur farið jafn illa út úr faraldrinum og Bandaríkin ef miðað er við dánartölur. Smitum hefur þó farið fækkandi síðan í janúar.

„Það er kominn tími til að opna Texas 100%,“ sagði Gregg Abbott, ríkisstjóri, í síðustu viku þegar hann kynnti fyrirætlanirnar um afnám sóttvarnaðgerðanna.

Hafnarboltaliðið The Texas Rangers ætlar að vera fyrsta stóra atvinnumannaliðið í Bandaríkjunum til að hleypa áhorfendum inn á heimavöll sinn á nýjan leik. Talsmenn liðsins tilkynntu á miðvikudaginn að þeir hafi í hyggju að selja 40.300 miða á heimaleiki sína í lok mars og byrjun apríl en það þýðir að selt verður í öll sæti á vellinum.

Samkvæmt upplýsingum frá Johns Hopkins háskólanum þá hafa um 530.000 manns látist af völdum COVID-19 í Bandaríkjunum. Þar af um 46.000 í Texas.