Nokkur mál hafa komið upp í Bandaríkjunum og Kanada þar sem fólk hefur reynt að svindla sér fram fyrir í bólusetningaröðinni til að fá skammt af hinum eftirsóttu bóluefnum gegn kórónuveirufaraldrinum. Í síðustu viku komu tvær „gamlar konur“ til dæmis akandi að bólusetningarmiðstöð í Flórída til að fá seinni skammtinn sinn af bóluefninu frá Pfizer. En starfsfólk sá að eitthvað var grunsamlegt við konurnar.

„Gömlu konurnar“ sem höfðu þegar fengið fyrri skammtinn virtust eiginlega vera ótrúlega ungar. Fæðingardagarnir á skilríkjum þeirra voru ekki samhljóða og því var kallað á lögregluna. Þá kom sannleikurinn upp á yfirborðið.

„Gömlu konurnar“ reyndust vera 34 og 44 ára en til að komast fram fyrir í röðinni þóttust þær vera ömmur sína. „Þetta voru vandræðaleg mistök og nú höfum við hert öryggisreglurnar,“ sagði í fréttatilkynningu frá smitstjúkdómastofnuninni CDC í Flórída.

Í Kanada komust auðmannshjónin Rodney og Ekaterina Baker í fréttirnar nýlega eftir að þau fóru með einkaflugvél frá Vancouver til Beaver Creeik og þóttust starfa við þrif á hóteli á svæðinu til að fá bólusetningu með bóluefninu frá Moderna. Með þessu tróðust þau fram fyrir gamalt fólk af frumbyggjaættum sem átti að njóta forgangs í bólusetningunni. Það komst upp um hjónin og hafa þau verið kærð vegna málsins og jafnframt gert ljóst að þau fá ekki síðari skammtinn af bóluefninu og fari aftast í röðina og verði ekki bólusett fyrr en í sumar.