Bandarískur flutningabílstjóri hefur verið handtekinn, grunaður um morð og ósæmilega meðferð á líki. Það var fyrrum fyrirsæta sem hann er grunaður um að hafa myrt. Það var miði í buxnavasa hennar sem kom lögreglunni á spor flutningabílstjórans.

New York Post skýrir frá þessu. Konan hét Rebecca Landrith og var 47 ára.

Lík hennar fannst fyrir rúmri viku í vegkanti við hraðbraut í Pennsylvania. Hún hafði verið skotin 18 sinnum.

Í vasa hennar var miði sem leiddi lögregluna til Tracy Rollins sem er 28 ára gamall flutningabílstjóri. Hann var handtekinn þremur dögum eftir morðið og fundust blóðblettir í bíl hans en þá hafði hann reynt að fjarlægja með klór.

Miðinn í vasa Landrith var kvittun sem sýndi að hún hafði verið á sama stað og Rollins miðað við upptökur úr eftirlitsmyndavélum. Einnig var nafn hans, símanúmer og tölvupóstfang á kvittuninni.

Lögreglan telur að Landrith hafi verið myrt nokkrum klukkustundum áður en lík hennar var skilið eftir við hraðbrautina. Lögreglan hefur ekki skýrt frá ástæðu morðsins.