Ivanka Trump, dóttir Donald Trump Bandaríkjaforseta, og eiginmaður hennar, Jared Kushner, eru bæði titluð sem ráðgjafar í Hvíta húsinu. En þau störf virðast ekki taka mikinn tíma því þau koma að minnsta kosti ekki í veg fyrir að þau sinni viðskiptum af miklum móð. Þau högnuðust vel á síðasta ári en samkvæmt upplýsingum sem voru birtar í síðustu viku höfðu þau sem nemur um 5 milljörðum íslenskra króna í hagnað af rekstri sínum á síðasta ári.

New York Times skýrir frá þessu. Fram kemur að tekjurnar komi úr ýmsum áttum en stærsti hlutinn er tilkominn vegna kaupa og sölu á fasteignum. Ekki kemur fram í upplýsingunum hverjar eignir hjónanna eru. New York Times segir að heildarinnkoma hjónanna á síðasta ári gæti hafa verið sem nemur allt að 100 milljörðum íslenskra króna.

Kushner, sem er meðeigandi í fasteignafélaginu Kushner Companies, hefur oft verið gagnrýndur fyrir að halda áfram að stunda fasteignaviðskipti á meðan hann sinnir ráðgjafastörfum fyrir tengdaföður sinn í Hvíta húsinu.