Það er frekar rólegt yfir ferðamannaiðnaðinum þessar vikurnar vegna heimsfaraldurs kórónuveirunnar og hjá mörgum flugfélögum er lítið sem ekkert að gera. EVA Air, eitt stærsta flugfélagið á Taívan, hefur brást við þessu með því að bjóða upp á það sem má líklega kalla undarlegustu flugferðina sem farin hefur verið að undanförnu en hún var farin á laugardaginn. Hún var farin í Hello Kitty flugvél og áfangastaðurinn var enginn!

Hljómar undarlega en er dagsatt. Félagið bauð áhugasömum að kaupa sér miða í þriggja klukkustunda flugferð sem hófst á Songshan flugvellinum og lauk þar. Markmiðið var sem sagt bara að sitja í vélinni í þrjár klukkustundir og fljúga um loftin blá. Það var engin tilviljun að laugardagurinn varð fyrir valinu því það var feðradagurinn á Taívan að sögn CNN.

Í tilkynningu frá félaginu sagði að markmiðið með þessari óvenjulegu flugferð hafi verið að uppfylla þarfir fólks í ferðahug. Flugleiðin hafi legið yfir nokkrar af perlum Taívan, til dæmis Guishan eyjua og Huadong ströndina. Til að gera ferðina enn ánægjulegri var hún farin í hinni vinsælu Hello Kitty Dream vél félagsins sem er af gerðinni Airbus A330.