Í rúmlega þrjú ár var hann stjórnandi margra hópa á netinu sem snúast um barnaklám. Maðurinn, sem er tölvuverkfræðingur, var alltaf mjög varkár og faldi slóð sína vel en honum urðu þau á þau mistök að afhjúpa smávegis af bakgrunni sínum og það fór ekki fram hjá árvökulum laganna vörðum í Ástralíu sem létu starfsbræður sína í Danmörku vita.
Maðurinn, sem heitir Allan Poulsen, var handtekinn í október á síðasta ári þegar hann var á leið til vinnu og hefur setið í gæsluvarðhaldi síðan. Hann var ákærður fyrir kerfisbundna og skipulagða dreifingu á barnaklámi. Hann játaði sök að mestu leyti fyrir dómi.
„Ég hef verið heimskur, óþroskaður og hræddur við að biðja um aðstoð til að fá meðferð við þessu.“
Hann hefur verið kvæntur í 16 ár. Helsta áhugamál hans, fyrir utan barnaklámið, var hundurinn hans.
Á djúpnetinu, Tor, kallaði hann sig „DoctorHebe“. Þar var hann stjórnandi á tveimur síðum.
Á heimili hans fundust drif og tölvur sem innihéldu í allt 159.956 barnaklámsmyndir. 1.409 flokkast sem sérstaklega grófar.
Þegar saksóknari spurði hann fyrir dómi hversu lengi hann hafi haft áhuga á ókynþroska stúlkum var svarið:
„Alltaf.“
Hann sagði að eiginkonan hafi vitað af þessu og þau hafi rætt þetta sín á milli og sagðist hafa glímt við slæma samvisku vegna áhugans á barnaklámi.
„Af því að það er rangt. Það er að minnsta kosti óásættanlegt í þessu samfélagi.“
Sagði hann um slæmu samviskuna. Þegar saksóknari spurð hann hvort honum fyndist barnaklám óásættanlegt var svarið:
„Á áttunda áratugnum var barnaklám gefið út í Danmörku.“
