Í nýlegri yfirlýsingu frá bandaríska utanríkisráðuneytinu er sagt skýrt og greinilega að Kínverjar hafi farið yfir strikið hvað varðar Suður Kínahaf og að Bandaríkin muni ekki sætta sig við framferði þeirra þar. Kínverjar gera miklar kröfur til yfirráða á hafsvæðinu og hafa á undanförnum árum reynt að styrkja stöðu sína með því að reisa herstöðvar á litlum og jafnvel óbyggðum eyjum, jafnvel skerjum, auk þess að ganga harkalega fram gagnvart skipum og bátum frá öðrum ríkjum sem sigla um svæðið.

Í yfirlýsingu bandaríska utanríkisráðuneytisins kemur fram að nú verði stefnan varðandi Indlandshaf, Kyrrahaf og Suður Kínahaf styrkt. Það sé alveg ljóst að kröfur Kínverja um yfirráð yfir Suður Kínahafi og náttúruauðlindum þar séu ólöglegar og það sama gildi um aðferðir þær sem þeir beita til að öðlast yfirráð yfir svæðinu. Mike Pompeo, utanríkisráðherra, skrifaði undir yfirlýsinguna.

Fyrir fjórum árum kvað Alþjóðagerðardómurinn í Haag upp úr um að kröfur Kínverja um yfirráð á svæðinu og framferði þeirra brjóti gegn alþjóðlegum reglum. Kínverjar viðurkenna ekki niðurstöðu gerðardómsins og hafa ótrauðir haldið framferði sínu áfram.