Á föstudaginn staðfesti áfrýjunarréttur, Lögmannsréttur, í Osló 21 árs fangelsisdóm yfir Eirik Jensen fyrrum yfirmanni hjá lögreglunni. Hann var fundinn sekur um umfangsmikla spillingu og aðild að fíkniefnasmygli. Dómurinn staðfesti þar með niðurstöðu undirréttar í Osló frá 2017.

Jensen sagði við dómsuppkvaðningu að hann muni áfrýja dómnum til Hæstaréttar. Hægt er að áfrýja dómum Lögmannsréttarins til Hæstaréttar en aðeins að því er varðar þyngd refsingar, málsmeðferð og lagaákvæði. Mat á sönnunarbyrði og sekt eða sýknu er hjá Lögmannsréttinum sem hefur endanlegt orð um þá þætti.

Við dómsuppkvaðninguna á föstudaginn sagði Mette Trovik, dómari, að hún tryði ekki einni einustu af þeim skýringum sem Jensen kom með fyrir dómi. Að dómsuppkvaðningu lokinni komu óeinkennisklæddir lögreglumenn og  fluttu Jensen á brott.

Jensen, sem er 62 ára, stýrði áður þeirri deild lögreglunnar sem rannsakar fíkniefnamál og mál skipulagðra glæpagengja. Foringi stórs hóps fíkniefnasmyglara, kallaður hassbaróninn, hefur játað að hafa smyglað miklu magni af hassi til Noregs á 20 ára tímabili og að það hafi verið hægt vegna þess að Jensen aðstoðaði hann með því að senda honum dulmálsskilaboð.

Hassbaróninn, sem heitir Gjermund Cappelen, fékk tveggja ára mildun á þeim dómi sem hann fékk fyrir fíkniefnasmygl fyrir að skýra frá þætti Jensen. Cappelen þarf að afplána 13 ára dóm.