Adrian Hill, prófessor, er einn þeirra vísindamanna við Oxford háskóla, sem vinna að gerð bóluefnis gegn kórónuveirunni sem veldur COVID-19 sjúkdómnum. Vísindamennirnir hafa látið hafa eftir sér að 80% líkur séu á að bóluefni þeirra virki og að það komi jafnvel á markað í september. En vísindamennirnir standa frammi fyrir þeim vanda að veiran „hverfur“ svo hratt að erfitt er að prófa bóluefnið á fólki.

Sky skýrir frá þessu. Ástæðan er að smitum fer fækkandi í Bretlandi og hugsanlega kemur sú staða upp að ekki verður nægilega mikið af fólki til að prófa bóluefnið á að sögn Hill.

The Sunday Telegraph hefur eftir honum að nú séu um 50% líkur á að engin niðurstaða fáist með prófunum á bóluefninu. Sú skrýtna staða sé komin upp að vísindamennirnir vilji að veiran haldi sig í samfélaginu, að minnsta kosti aðeins lengur.

Bóluefnið nefnist ChAdOx1 nCoV-19 (borið fram Chaddox One). Því hefur verið sprautað í 160 heilbrigða sjálfboðaliða á aldrinum 18 til 55 ára til að sjá hver virkni þess er. Á öðru og þriðja stigi tilrauna á að prófa efnið á rúmlega 10.000 manns og auka aldursbilið.

En ef of fáir smitast af veirunni í samfélaginu geta vísindamennirnir ekki rannsakað hvort bóluefnið veiti vörn gegn smiti.