Í nýrri skýrslu, sem fjallar um hina gríðarlegu gróðurelda sem herjuðu á Ástralíu sumarið 2019-2020, segir að Ástralar verði að gera róttækar breytingar á hvernig þeir berjast við slíka elda. Það eru breyttar loftslagsaðstæður sem valda þessu.

Fyrrnefndir gróðureldar voru bara forsmekkurinn af því hvað hnattræn hlýnun getur fært okkur í framtíðinni og gera þarf róttækar breytingar á viðbrögðum við hamförum af þessu tagi segir í skýrslunni en það var opinber rannsóknarnefnd sem gerði hana.

Settar eru fram 80 tillögur um úrbætur og breytingar, þar á meðal um sameiginleg viðbrögð og nýja löggjöf sem heimilar forsætisráðherra landsins að lýsa yfir neyðarástandi. Mælt er með samræmingu aðgerða og aðferðafræði um allt land og að rétt sé að hafa eina yfirstjórn á landsvísu.

Hnattræn hlýnun getur ógnað hefðbundnum aðferðum við slökkvistörf og gert þau líkön, sem eru notuð til að spá fyrir um gróðurelda, síður áreiðanleg. Náttúruhamfarir framtíðarinnar eru sagðar geta orðið „flóknari, ófyrirsjáanlegri og erfiðari viðureignar“.

Einnig segja skýrsluhöfundar að Ástralar muni líklega upplifa miklar hamfarir á borð við elda, flóð og óveður á sama tíma. Slíkar hamfarir muni hafa keðjuverkandi áhrif og ógna lífum og eignum, efnahag landsins, innviðum og nauðsynlegri þjónustu.