Frönsk og þýsk stjórnvöld munu leggja til að refsiaðgerðum verði beitt gegn þeim aðilum sem talið er að hafi staðið á bak við morðtilræðið við rússneska stjórnarandstöðuleiðtogann Alexei Navalny. Eitrað var fyrir honum með taugaeitrinu Novichok. Grunur leikur á að rússnesk stjórnvöld hafi staðið á bak við tilræðið.

Frönsk og þýsk stjórnvöld hafa sent öðrum aðildarríkjum ESB tillögur um aðgerðir sem eiga einnig að beinast að þeim sem vinna við gerð Novichoc.

Navalny hefur verið í Berlín síðan hann var fluttur þangað nokkrum dögum eftir tilræðið. Í yfirlýsingu Frakka og Þjóðverja er ekki farið nánar út í hverjir eiga að sæta refsiaðgerðum.

Stjórnvöld í Moskvu hafa sagt að allar ásakanir um tengsl þeirra við málið séu stoðlausar og neita að rannsaka málið þar sem engin sönnunargögn séu til staðar.