Persónulegar árásir, frammíköll og annað settu mark sitt á kappræðurnar sem þóttu að margra mati sorglega lélegar og þær verstu í sögunni á milli forsetaframbjóðenda. Wallace reyndi ítrekað að setja ofan í við Trump og ná stjórn á kappræðunum en það tókst ekki vel. Gagnrýni hefur rignt yfir Wallace, sem er enginn nýgræðingur í sjónvarpi, og nú hefur hann tjáð sig um málið.
„Mér þykir miður hvernig þetta endaði í gærkvöldi,“
sagði hann í gær í samtali við New York Times. Hann sagði að kappræðurnar hafi verið „tækifæri sem rann úr höndum okkar á skelfilegan hátt“.
„Ég hefði aldrei getað ímyndað mér að þetta myndi fara svona af sporinu,“
bætti hann við. Hann viðurkenndi að hafa áttað sig of seint á að Trump ætlaði ekki að virða þær leikreglur sem höfðu verið settar.
Í kjölfar kappræðnanna hafa skipuleggjendur þeirra sagt að tilhögun þeirra verði breytt fyrir þær næstu. Ein af hugmyndunum sem nú er unnið með er að stjórnandinn fá vald til að lækka í hljóðnema frambjóðendanna.
„Ég er búinn að lesa nokkrar umsagnir. Ég veit að fólk hugsar með sér að ég hafi ekki brugðist nægilega vel við. Ég held að ég hafi ekki áttað mig á að þetta væri taktík forsetans allan tímann, ekki bara í upphafi. Það er engin leið til að átta sig á því fyrir fram, þetta er fyrst ljóst eftir á,“
sagði Wallace.
Wallace, sem er fréttamaður hjá Fox News, stöðvaði kappræðurnar á einum tímapunkti og sagði að „það væri betra fyrir landið ef báðir frambjóðendur fengju að tala með færri truflunum“. Aðspurður um hvað fór í gegnum huga hans á þessum tímapunkti sagði Wallace:
„Örvænting.“
