Fyrir rúmri viku var lögreglunni í Nordland í Noregi tilkynnt um að lík hefði fundist í sumarbústað í Fauske. Ljóst var frá upphafi að líkið hafði legið þar lengi, árum saman.  Lögreglan sagði síðar að líklega hefði líkið verið í sumarbústaðnum í fimm ár og að það væri orðið að „múmíu“. Það voru skilríki, sem fundust á staðnum, sem gera að verkum að lögreglan nefndi fimm ár.

Ekki er enn vitað hver maðurinn er en lögreglunni hafa borist margar ábendingar frá almenningi. Talið er að maðurinn hafi verið um fimmtugt og af evrópskum uppruna. Hann var ekki norskur ríkisborgari segir lögreglan.

Ronny Borge, lögreglustjóri, sagði í samtali við TV2 að lögreglan haldi öllum möguleikum opnum og útiloki ekki að um morð sé að ræða.

„Það væri verst ef um morð væri að ræða. Þá erum við fimm árum á eftir í rannsókninni.“

Sagði hann og bætti við að lögregluna grunaði ekki að um morð væri að ræða en hún útiloki ekki neitt þar til niðurstöður krufningar liggja fyrir.